O pasado 11 de xuño estreouse en Lalín este documental, un retrato do home e do artista a través do testemuño de persoas achegadas a Laxeiro como o seu neto, Carlos García-Suárez Otero, o pintor Antón Lamazares, as historiadoras Pilar Corredoira e Cecilia Doporto, o biógrafo de Laxeiro e catedrático de Historia da Arte, Xosé Antón Castro, e os escritores Daniel González Alén e Carlos Reigosa.
O documental complétase con fragmentos dunha entrevista inédita a Laxeiro e documentación fotográfica de diferentes momentos da súa vida.
O traballo, realizado por Emilio J. Fernández, foi unha encarga do concello de Lalín e a Xunta de Galicia, con motivo do Ano Laxeiro, consecuencia do acordo da Real Academia Galega de Belas Artes de dedicar o Día das Artes Galegas ao pintor de Lalín.